Durante os pasados días 20 ao 26 de novembro, policías do Grupo Operativo de Actividades Subacuáticas (GOAS) da Unidade de Policía Nacional Adscrita de Galicia (UPA), xunto coa Unidade de Buceo de Ferrol (UBUFER), realizaron o “Curso de Técnicas de Altura, Ríos, Riadas e Inundacións 2025”, unha formación organizada desde a AGASP e impartida pola Asociación Sociocultural de Bombeiros de Galicia.

O curso desenvolveuse en contornos reais, o que permitiu aos participantes levar a cabo simulacros e exercicios prácticos ante diversas situacións de emerxencia. O obxectivo principal desta iniciativa foi fortalecer a colaboración e o intercambio de coñecementos entre ambas institucións, co fin de mellorar as capacidades de actuación en contornos de difícil acceso, tanto verticais como acuáticos en superficie e sumerxidos, así como en situacións de emerxencia ocasionadas por ríos, riadas e inundacións.

O curso desenvolveuse en dúas fases complementarias:

Unha primeira fase na que se realizaron traballos en vertical e altura, na que os participantes adquiriron habilidades e coñecementos en técnicas de progresión e seguridade en contornos verticais.

E unha segunda fase centrada en traballos en contorno acuático, na que os exercicios se desenvolveron nun río, permitindo simular situacións propias de riadas e inundacións e enfocándose en técnicas de rescate e seguridade en medios acuáticos.

O programa combinou sesións teóricas e prácticas, permitindo aos participantes aplicar os coñecementos adquiridos en escenarios o máis realistas posible. Estas capacidades adicionais permiten a ambos corpos enfrontarse de maneira eficaz a situacións complexas e desafiantes no ámbito da busca, o salvamento e o rescate, así como a coordinación para futuras intervencións en contornos verticais e acuáticos. Deste xeito, prepáranse para actuar ante situacións complexas como as ocorridas durante a DANA, que requiren traballos de busca e rescate en contornos difíciles como son as zonas inundadas, contribuíndo a unha resposta segura e profesional ante emerxencias de alto risco.