O conselleiro de Presidencia, Xustiza e Deportes, Diego Calvo, acompañado polo director xeral de Emerxencias e Interior, Santiago Villanueva, e o comisario xefe da Unidade de Policía Nacional Adscrita (UPA) de Galicia, Jorge Rubal, reuniuse co novo xefe provincial da UPA en Lugo, o inspector xefe Moisés Muñiz, quen accede ao cargo tras a xubilación do seu predecesor, Javier García. No encontro, o conselleiro deulle os parabéns pola nova responsabilidade e desexoulle un frutífero labor no cargo da sede provincial da UPA, do que tomou posesión o pasado venres.

Moisés Muñiz foi desde 2003 xefe do Grupo de Información da comisaría provincial da Policía Nacional en Lugo, onde en 2005, e ata 2006, asumiu a xefatura do Módulo Integral de Proximidade. Nese ano asumiu o cargo de xefe do Grupo de Estupefacientes e, desde 2009, do Grupo Operativo de Seguridade Privada, onde permanecería ata 2018. No primeiro semestre de 2019 trasladouse á Comisaría Provincial de Ourense como xefe de Brigada Provincial de Estranxeiría e Fronteiras para regresar á de Lugo na segunda metade do ano como xefe de Brigada Provincial de Policía Xudicial.  

Nacido en León en 1972, é Licenciado en Administración e Dirección de Empresas pola Universidade de León e licenciado nomeamento Escala Executiva da Policía Nacional  con diploma en Ciencias Policiais pola Universidade de Salamanca. Está ademais habilitado como xefe e director de seguridade privada polo Ministerio do Interior.

Ao longo da súa traxectoria recibiu diversas felicitacións e recoñecementos, entre os que cómpre salientar unha cruz ao mérito policial e outra ao mérito da Garda Civil.