Axentes da Unidade de Policía Nacional Adscrita de Galicia e o servizo de Gardacostas de Galicia comisaron case 42 quilos de marisco, entre percebes, ameixas e navallas; así como diverso material utilizado para estas prácticas furtivas, no marco de dous operativos conxuntos desenvolvidos na ría da Coruña e na ría de Ferrol.

Na intervención da Coruña, realizada o pasado 7 de agosto, comisáronse un total de 25 quilos de ameixa, 12,5 quilos de percebe, diverso material e incautouse un vehículo. Ademais, os axentes identificaron a catro persoas ás que se lles tramitaron catro actas de sanción por infracción á Lei de Pesca de Galicia. As ameixas comisadas foron resementadas no lugar onde se atoparon, mentres que o percebe foi entregado a un centro benéfico da cidade da Coruña.

Nun segundo operativo, realizado na ría de Ferrol entre a noite do martes 12 e a madrugada do mércores 13 de agosto, comisáronse 4,1 quilos de navalla. Neste caso, identificáronse a seis persoas e tramitáronse tres actas de sanción. O marisco comisado puido ser resementado no lugar de extracción.

Estes dous operativos, que remataron cun global de 10 persoas identificadas e sete actas de sanción por infrinxir a Lei de Pesca, enmárcanse no reforzo realizado pola UPA, en colaboración coa Consellería do Mar, no eido da loita contra o furtivismo e na protección dos recursos mariños afectados por esta actividade ilegal. O traballo céntrase en dispositivos dirixidos a impedir a actuación dos furtivos, tanto na actividade extractiva como na venda, transporte e distribución do produto sen as debidas garantías sanitarias.