Axentes do Equipo de Resposta Policial (Erpol) da Unidade de Policía Nacional Adscrita de Galicia (UPA) e efectivos do servizo de Gardacostas de Galicia levaron a cabo, en colaboración coa confraría da Coruña, un dispositivo contra a extracción ilegal de recursos mariños na costa da cidade da Coruña, que se saldou co comiso de 13 quilos de percebe. 

No marco deste operativo, desenvolvido a principios deste mes de xullo, os axentes tramitaron 3 denuncias por infracción da Lei de Pesca de Galicia logo de identificar outras tantas persoas realizando labores de extracción furtiva en zonas rochosas do litoral para dirixirse posteriormente coa mercancía a un establecemento dedicado á venda de produtos do mar.  

Este operativo enmárcanse no reforzo realizado pola UPA, en colaboración coa Consellería do Mar e coas confrarías de pescadores, no eido da loita contra o furtivismo e na protección dos recursos mariños afectados. O traballo céntrase en dispositivos dirixidos a impedir a actuación dos furtivos, tanto na actividade extractiva como na venda, transporte e distribución do produto sen as debidas garantías sanitarias.