O conselleiro de Presidencia, Xustiza e Deportes, Diego Calvo, incidiu no importante labor desenvolvido polo persoal da Unidade de Policía Nacional Adscrita a Galicia como referencia para as persoas operadoras da sala do 112 na atención ás incidencias das súas competencias e das da Policía Nacional. 

Drons para apoio ás funcións policiais
Diego calvo na visita á Axencia Galega de Emerxencias (Axega), acompañado polo director xeral de Emerxencias e Interior, Santiago Villanueva, e o xerente da Axega, Marcos Araújo, para a entrega de dous drons á Unidade Policial Adscrita de Galicia. Trátase dun dron acuático e doutro aéreo, que servirán para apoiar as funcións deste corpo policial en áreas como a loita contra o furtivismo e os incendios forestais e a protección do medio ambiente, entre outras relacionadas coa seguridade e a protección. O material, presupostado en 16.200 euros, foi recibido polo comisario xefe da UPA, Jorge Rubal, e  membros do Equipo de Resposta Policial (Erpol).

A iniciativa enmárcase na aposta da Xunta pola mellora das dotacións dos servizos de atención ás emerxencias e, concretamente da Policía Autonómica, para reforzar a eficacia do seu labor. Nesta liña de acción, nos últimos anos renovouse o parque móbil da unidade, así como o equipamento informático.

O conselleiro quixo agradecer o traballo realizado pola Policía Autonómica e insistiu na necesidade de cubrir o catálogo de persoal previsto para Galicia, establecido en 500 axentes. Na actualidade o corpo conta con 344 membros, o que supón un déficit superior ao 30% e que irá a máis coas xubilacións. Para Diego Calvo, esta situación pon en risco a cobertura eficaz das numerosas competencias que foi asumindo a UPA ao longo dos anos, de especial relevancia na protección das persoas e do patrimonio colectivo.