A Xunta de Galicia recuperou hoxe do mar un canón de bronce nun operativo levado a cabo na zona de Punta Sardiñeiro, en Fisterra. Trátase dunha peza pertencente ao ámbito do pecio denominado de Punta Restelos e identificado como un buque do S.XVI que, segundo as investigacións, corresponderíase co Galeón Santa María La Anunciada, parte da frota que se afundiu nestas augas no ano 1596.

Así, a Consellería de Cultura, Lingua e Xuventude, a través da Dirección Xeral de Patrimonio Cultural, catalogou o achado, localizado a 3,8 metros de profundidade e a escasa distancia da costa, de grande interese arqueolóxico e considerou a súa extracción e traslado a un centro museístico por determinar, para evitar actos de espolio e a perda dunha peza histórica.

O operativo, que partiu sobre as 11,00 horas desde o porto fisterrán, estivo coordinado por técnicos do departamento de Patrimonio da Xunta e nel tomaron parte membros do Grupo de Buceo da Unidade da Policía Adscrita á Comunidade Autónoma de Galicia, membros da Unidade de Buceo da Armada, con sede en Ferrol, e membros do Club de Buceo de Fisterra.

Pendente das análises por parte dos técnicos unha vez extraído, os primeiros informes sobre este elemento indican que se corresponde cun canón pedreiro de bronce, documentado en pasadas campañas arqueolóxicas, que conta cunhas dimensións aproximadas de dous metros e unha apertura na boca de 26 centímetros de diámetro.